Tenturoo aniŋ dankeneyaa mantooroo kono
Meŋ be suukuulaa ñaatonkayaa la: A si laa juloo la ì ka a fo meŋ ye ko, “Kana kasaaroo ke.” Dawuda la Jabuuroo, kabiriŋ a borita Sawulu la ka taa maabo berehuwo kono.
1 Balafaa n ye, hee Alla, balafaa n ye,
kaatu n niyo be karafariŋ ite le ma.
M be i la tankoo koto le
ko a dampammaa le ye m muuri,
fo kasaaroo turubaadimaa ye tambi.
2 N woosiita Alla Mansa Tallaa ye,
ate meŋ ka a la natoolu timmandi n ye.
3 A be n jaabi la le ka tankoo jindi n ye naŋ.
A be moolu malundi la le
mennu ka mantooroo laa n kaŋ.
SAlla be a la kanu bambaloo niŋ tiliŋo yitandi la n na le.
4 Nte ka munta le ko, m be jata konkoriŋolu le teema.
Ì ñiŋolu munta le ko soora kesoolu niŋ kalabeñoolu,
ì neŋolu be ko hawusaroo*.
5 Kooni Alla, i la horomoo faramansandi saŋ fatoolu kono,
i ye duniyaa bee fandi i la semboo niŋ waroo la.
6 N jawoolu ye jaloo le laa n ñaato,
n niyo dewunta n kono le.
Ì ye dinkoo le siŋ n na siloo kaŋ,
bari ì faŋolu le boyita a kono.
S7 Hee Alla, n sondomoo ye i la kuwo muta le,
a bambanta.
M be suukuwo laa la le ka i jayi.
8 M be m faŋ kuniŋ na le,
ŋa n na kontiŋo niŋ kooraa sika ka bo laariŋ.
M be fanoo la kewo kontoŋ na niŋ suukuwo le la.
9 Maariyo, m be i tentu la moolu bee le kono.
M be suukuwo laa la i ye le
ka i jayi duniyaa siyolu kono,
10 kaatu i la kanu bambaloo la waroo nakita saŋ fatoolu la le,
i la tiliŋo la waroo futata minaayoolu ma le.
11 Kooni Alla, i la horomoo faramansandi saŋ fatoolu kaŋ,
i ye duniyaa bee fandi i la semboo niŋ waroo la.
© Mandinka Bible © Bible Society in The Gambia, 2011.