Yamfoo koolaa seewoo
Dawuda la suukuwo.
1 Seewoo be moo le ye,
yamfa keta meŋ na junuboolu la,
meŋ na hakoo tuutuuta.
2 Seewoo be moo le ye,
Yaawe* maŋ meŋ na kuu jawoo muta a kamma,
aniŋ jenkoo te meŋ kono.
3 Kabiriŋ n tarata deyiriŋ m faŋ ma,
n kuloolu baabaata le,
ka bo niŋ n na ŋuntaŋo la, tiloo bee,
4 kaatu suutoo niŋ tiloo,
i bulu laata n kaŋ kendeke le.
M barakoo sulenta le,
a keta komeŋ tilikandikono jaa.
S5 Bituŋ ŋa n na boyidaa fo i ye,
aduŋ m maŋ n na kuu jawoo nukuŋ i ma.
N kumata le ko,
“M be n na junuboolu fo la Yaawe ye le.”
Bituŋ i yamfata n na junuboo dunoo la.
S6 Wo to moo-wo-moo mu i la moo ti,
a si duwaa ka i daani, koleyaa waatoo la.
Niŋ mantooroo waamemaa feeneeta naŋ,
a te futa la a ma.
7 I mu n ye maabodulaa le ti.
I be n tankandi la mantooroo ma le,
aduŋ suukuulaa le be tara la m fee karoo bee la,
i la n tankandoo kaŋ.
S8 Yaawe la kumakaŋo le mu ñiŋ ti ko,
“M be i yaamari la le,
ka a fo i ye i ñanta taa la siloo meŋ na.
M be a yitandi la i la le
i ñanta meŋ ke la, n ñaa ye tara i kaŋ.
9 Kana ke ko suwoo waraŋ bahalewo*,
hakili te meŋ na.
Karafewo niŋ juloo le ka a manankuŋ noo,
niŋ wo nte, a te soŋ na i ye.”
10 Moo kuruŋo niŋ kooroo jamaa le mu,
bari meŋ dankeneyaata Yaawe la,
wo ka tara tankariŋ a la kanu bambaloo le kono.
11 Alitolu mennu tilinta,
ali kontaani ka seewoo Yaawe la kuwo to.
Tiliŋo be alitolu mennu sondomoo kono,
ali seewoo kendeke.
© Mandinka Bible © Bible Society in The Gambia, 2011.