Moo sootaaribaloo la duwaa
Dawuda la Jabuuroo.
1 Hee Yaawe*, kiitiyo teyi n ye,
kaatu m be baluuriŋ sootaaribaliyaa le kono,
aduŋ n dankeneyaata i la le famfaŋ.
2 Hee Yaawe, n kotobo, i ye n kisikisi.
N sondomoo kono kusonsoŋ,
aniŋ n na miiroolu,
3 kaatu n hakiloo ka tu i la kanu bambaloo kaŋ ne doroŋ.
N dankeneyaata i la le, n na baluwo kono.
4 M buka sii neeneerilaalu kono,
waraŋ ka m bula bunaafayoolu fee.
5 Ŋa kuu jawu kelaalu kafuñooyaa koŋ ne,
aduŋ n niŋ moo kuruŋolu buka sii ñoo kaŋ.
6 Yaawe, ŋa m buloo kuu le
ka n na sootaaribaliyaa yitandi.
Niŋ m be baturoo la,
n ka i la sadaajanidulaa* muruŋ-muruŋ ne,
7 ka tenturu suukuwo laa santo,
ka i la kaawakuwolu bee seyinkaŋ.
8 Hee Yaawe, ŋa i taradulaa buŋo kanu le,
i la semboo niŋ waroo be daameŋ to.
9 Kana n niŋ junubelaalu kasaara ñoo la,
waraŋ ka n niŋ moofaalaalu niyo taa ñoo la.
10 Wo moolu buloo kalanta kuu jawu kewo la le,
aduŋ ì ka tu dukoolu le muta la.
11 Bari nte de, m be tara la baluuriŋ sootaaribaliyaa le kono.
Balafaa n ye, i ye n kiisa.
12 M be looñaa bambandiŋo le to.
M be Yaawe tentu la
a la moolu la beŋ baa to le.
© Mandinka Bible © Bible Society in The Gambia, 2011.